إغلاق الحساب البنكي .. أجي تفهم الطريقة الصحيحة

اغلاق الحساب البنكي
اغلاق الحساب البنكي

إغلاق الحساب البنكي 

اليوم غادي تستافد من معلومات وتفاصيل مهمة على اغلاق الحساب البنكي وكيفية كتابة نموذج طلب اغلاق الحساب

كلنا فهاد الوقت كنحتاجو نصيبو حساب بنكي سواء كنا أشخاص عاديين  تجار فلاحين، موظفين، أو طلبة أو شركات.. بحيت وللى من ضروريات الحياة التي لا يمكن الاستغناء عنها في عصرنا الحالي،  ووللى الحساب البنكي كيفيدنا بزاف دالفوائد فحياتنا، منها أنه وسيلة لحفظ الاموال ديالنا  وادخارها، وكيحافض على فلوسنا من الضياع والسرقات؛ حيت موجودة في مكان أمين، اضافة الى أنه كيسهل اجراء معاملاتنا البنكية بحال عمليات التحويل البنكي مثلا وغيرها.

 حتى أن الحساب البنكي ولا تيقوم بأشياء أكثر حيوية فحياتنا بحال الشراء عبر الانترنيت،  وتمويل المشاريع والاستثمارات… وزيد وزيد

أش كنعنيو باغلاق الحساب البنكي البنكي؟

الى كان الحساب البنكي كيبدا بطلب فتحه فأول مرحلة عبر الذهاب للمؤسسة البنكية وتقديم البطاقة الوطنية واختيار نوع الحساب، واش حساب جاري أو حساب توفير أو جماعي..

 وكيما لكل شيء بداية راه كتكون عندو نهاية، وكذلك الحساب البنكي عندو بداية ونهاية، حيت  يمكن اقفاله لمجموعة من الأسباب.

ومنها ما يلي: طلب اغلاق الحساب البنكي بمبادرة من العميل، وأيضا اغلاق الحساب البنكي بمبادرة من البنك وأيضا  بالوفاة أو انعدام الأهلية أو التسوية أو التصفية القضائية للزبون

ساين بلاتي، من بعد هادشي كامل أش كيقول القانون فاغلاق الحساب البنكي؟

الى رجعنا للقانون كنلقاو المادة 503 من مدونة التجارة كتقول هادشي:

يوضع حد للحساب بالاطلاع بإرادة أي من الطرفين، بدون إشعار سابق إذا كانت المبادرة من الزبون ومع مراعاة الإشعار المنصوص عليه في الباب المتعلق بفتح الاعتماد إذا كانت المبادرة من البنك.

غير أنه وجب أن يوضع حد للحساب المدين بمبادرة من البنك إذا توقف الزبون عن تشغيل حسابه مدة سنة من تاريخ آخر عملية دائنة مقيدة به.

وفي هذه الحالة، يجب على البنك قبل قفل الحساب، إشعار الزبون بذلك بواسطة رسالة مضمونة في آخر عنوان يكون قد أدلى به لوكالته البنكية.

إذا لم يبادر الزبون داخل أجل ستين يوما من تاريخ الإشعار بالتعبير عن نيته في الاحتفاظ بالحساب، يعتبر هذا الأخير مقفلا بانقضاء هذا الأجل.

يقفل الحساب أيضا بالوفاة أو انعدام الأهلية أو التسوية أو التصفية القضائية للزبون”.

باختصار شنو هي هاد الحالات حسب المادة 503 ؟

الحالة الأولى: بمبادرة الزبون

بحيث الى جاء زبون البنك يغلق الحساب ميحتاش البنكة تسيفط ليه اشعار ، لأنه حضر عندها. والبنكة الى كانت هي للي غادية تغلق الحساب البنكي خصها تسيفط ليه اشعار قبل اغلاق الحساب.

الحالة الثانية: بمبادرة البنك

 بحيت  الى كان الزبون مستعملش الحساب البنكي ديالو مدة سنة، وما عليه حتى ديون لصالح البنك فهاد المدة، فهاد الحالة خص البنك يسيفط للزبون قبل الاقفال دالحساب رسالة مضمونة  فآخر عنوان عطاه للبنك، كيشعرو باش يعبر على الرغبة ديالو للبنكة بخصوص حسابه، والزبون عندو مدة 60 يوم باش يرد على البنك ديالو واش بغا يستمر الحساب ولا يتغلق.

لكن الى دازت مدة 60 يوم بعد ارسال الاشعار وما ردشي الزبون، هنا كيخص البنكة تغلق الحساب بصفة إلزامية حسب المادة 503.

وهنا كيطرحو الناس واحد السؤال؟

شحال خص يكون الرصيد فالحساب باش تغلقو البنكة؟

كيما سبق وقلنا أن الحساب البنكي خص يكون ما تعملت فيه حتى عملية بنكية مدة سنة، يعني عام ماتحرك، وأيضا ميكونو عليك حتى ديون أو فوائد لصالح البنك.

لكن بالنسبة للرصيد للي كيكون متبقي،شخصيا ملقيت حتى مصدر فالقانون للي كيقول شحال، ولكن كاين للي كيقول خص يكونالرصيد  صفري، يعني الحساب فيه صفر درهم، وكاين للي كيقول أن البنكة خصها تقفل الحساب لأقل من 100 درهم وهاد المسألة منتشرة على مواقع التواصل الاجتماعي والمواقع للي شرحات طريقة اغلاق الحساب البنكي، وكاين رأي كيقول البنكة تقفل الحساب تكون فالرصيد أقل من 10 دراهم.

والنصيحة ديالي ليكم أخوتي:

الى كانت نيتكم تغلقو الحساب ديالكم سحبو الى فيه شي رصيد والى كانو شي ديون باقيين خلصوهم، وسيرو للبنكة وطلبو منها اغلاق الحساب بلا متساينو حتى تدوز سنة (حالة الاغلاق بمبادرة من الزبون)، وقدمو طلب اغلاق الحساب البنكي (غادي تلقاو نموذج الطلب لتحت) كتبوه ولا طلبو شي واحد يكتبولكم، وديرو فيه الاساب علاش غاتسدوه، ، ومن بعد ما تغلقوه طلبو من الموظف يعطيكم ورقة تثبت اغلاقه وخرجو من باب واسع.

ولتقديم طلب اغلاق الحساب البنكي ، ينبغي وضع طلب مكتوب بالمؤسسة البنكية ، وللاشارة فإنه لا ينبغي عليك تقديم طلب اقفال الحساب بصفة شفوية، وفيما يلي نموذج لطلب اغلاق الحساب البنكي .

نموذج طلب اغلاق الحساب البنكي

الحمد لله وحده

الموضوع: طلب ايقاف الحساب البنكي

الى السيد مدير وكالة …….

وكالة (مكان تواجد الوكالة )

لفائدة السيد ….. المزداد بتاريخ ….. الحامل لبطاقة التعريف الوطنية رقم ……. الساكن ب ………..

رقم الحساب البنكي: ……………..

سلام تام بوجود مولانا الامام

وبعد،

سيدي المدير،

نظرا لظروف خاصة واستتنائية لم تعد تسمح لي بفتح حسابي لدى وكالتكم مما ارتأيت معه الى اللجوء اليكم من اجل اغلاق الحساب المذكور اعلاه بمجرد توصلكم بهذا الطلب.

وبالتالي التمس من وكالتكم تسجيل هذا الاعفاء من اليوم وبصفة نهائية ورسمية.

وفي انتظار ذلك تفضلوا مني سيدي فائق التقدير والاحترام والسلام.

امضاء:

نتمنى يكون فادكم هاد الموضوع

وفهمتو طريقة اغلاق الحساب البنكي مزيان

ومتنساوش تشاركوه معا اصدقاءكم لتعم الفائدة.

شارك لتعم الفائدة